பொக்கிஷம்

பிரிந்திட மனமின்றி
விடைபெறும் வேளையிலே
நீ தந்த முத்தத்தை
பத்திர படுத்தி வைத்தேன்
அன்பே உன் மடி சேர்ந்து
அழகான செவ்விதழால்
அடுத்த முத்தம் ஒன்று
பெற்றிடும் அதுவரையில் !!!!

தொலைவு

ஒன்றல்ல இரண்டல்ல

ஓராயிரம் கதைகள்.....

ஒருவர் அருகில் மற்றொருவர் உட்கார்ந்து

கதைத்திட்ட  காலம் போய் ....

என்று  காண்போமோ எனும்

ஏக்கத்துடன் ஏந்திக்கொண்டு

ஒற்றைக் கைப்பேசியின் .

ஒரு முனை நீயும்

மறு முனை  நானும்!!!!

குடும்பம்

ஆலமர நிழல் போல 
அழகானதோர்  கூறையின்  கீழ் 
அண்ணன் தம்பி ஐவர் மற்றும்  
அவர்தம் மனைவி மக்கள் சுற்றம் 
அழைத்ததும் ஓடிவரும்  ஐந்தாறு பணியாள் 
அறுசுவை சமைத்திடும் அடுக்குளை நளன்மார் 
ஆடு, மாடு, கோழி, குருவி 
அறிவுரை வழங்கிடும் கிழவன் கிழவி என 
அன்பின் இலக்கணமாய்த் திகழ்ந்த 
அன்றைய "கூட்டுக்குடித்தனங்கள்"
இன்றும் காணப்படுகின்றன...
வெறும் வரலாற்றுச் செய்திகளாய்ப் 
பத்திரிகைகளில் மட்டும் !!!!!

இன்றைய “பரதேசி”கள்

 

நம் முன்னோர்கள்
தேயிலைத்தோட்டத்தில் தம்
செந்நீரைச் சிந்தியதைக் கண்டு
கண்ணீர் விடுவதோடு மட்டும்
முடிந்துவிடவில்லை நம் கடமை...

சுதந்திரம் கிடைத்த பின்னும்
சொந்த மண்ணை விட்டுவிட்டு
வெள்ளையன் தன் வயிற்றைக்
கழுவப் படைத்திட்ட
பன்னாட்டு நிறுவனங்களில்
தன்னையே அர்ப்பணித்து
இரவு பகல் பாராமல்
எந்நேரமும் பணிபுரியும்

இன்றைய படித்த “பரதேசி” களாகிய நாம்
விழித்துக்கொள்வதில்
விதைக்கப்பட்டிருக்கின்றது
நம் நாட்டின்
விதியும்
விடிவுகாலமும் !!!!!

தொடர்கதை...

அம்மா,
விளையாட்டாய்
நான் கலைத்த
உன் பல நாள்
தூக்கங்களின்
விலை மதிப்பை

உணருகின்றேன்.....
கண்ணயர்ந்து தூங்குகையில்
என் கண்ணிமையைத்
திறந்து பார்க்கு மென்
கண்மணி யின்
குறும்பு தன்னில்!!!!!

அவள்

பெண்ணின் பெருமையை உணர்வோம்- இந்த
மண்ணுலக மவளை மதித்திட செய்வோம்

செல்வத்தில் சிறந்த செல்வம்- அது
கள்ளம் கபட மிலா பிள்ளைச் செல்வம்
மழலை இல்லா மனிதன் வாழ்வில்
மகளாய்ப் பிறந்து மனமகிழ்  வளிப்பாள்

தனிமையும் வெறுமையும் சூழ்ந்து- ஒரு
துணையின்றி வாடும் ஆடவன் வாழ்வில்
இனிமையும் இன்பமும் சேர்க்கும்- நல்
துணையாய் வந்து துயரங்கள் களைவாள்

பொன்னையும் பொருளையும்  வேண்டி- பெரும்
போர்க்களம் செய்திடும் வையக மதனில்
தன்னலம் துளியும் இல்லா- ஒரு
அன்னையாய் அன்பினை அள்ளித் தருவாள்

அண்டத்தில் சிறந்தவள் பெண்ணே
அன்பினை வளர்ப்பவள் பெண்ணே
மங்கையை வணங்கிக் காத்தால்
வையகம் சென்றிடும் முன்னே...

கோரிக்கை

ஆண்டாண்டு
காலங்கள்
அகிலத்தில்
வாழ்ந்திட
அகவையை
வேண்டவில்லை
அரைநொடி
வாழினும்
அதுவரை
நீடிக்கும்
அமைதியை
வேண்டுகின்றேன்!!!